ମାଲକାନଗିରି,୦୮/୦୨ (ସୁଧାଂଶୁ ଶେଖର ମହାନ୍ତି)ଦେଶ ସ୍ୱାଧୀନ ହୋଇ ସାତ ଦଶନ୍ଧି ଅତିକ୍ରମ କରି ଆଠ ଦଶନ୍ଧିକୁ ଛୁଇଁବାକୁ ଯାଉଛି। ହେଲେ ଆଜି ମଧ୍ୟ ମାଲକାନଗିରି ଜିଲ୍ଲାରେ ବିକାଶ ଅନେକ ସ୍ଥାନରେ ବାଟ ହୁଡିଛି। ବିକାଶର ଡିଣ୍ଡିମ ପିଟୁଥିବା ଓ ରାଜ୍ୟରେ ପଛୁଆ ଅଞ୍ଚଳରେ ବିକାଶ ଏବଂ ଓଡିଆ ଅସ୍ମିତା କଥା କହୁଥିବା ରାଜ୍ୟ ସରକାର କାଗଜ କଲମରେ ଅନେକ କିଛି ବିକାଶ କରୁଥିବା କହୁଥିବା ବେଳେ ଆଜି ଯାଏଁ ଜିଲ୍ଲାର ଗୋନ୍ଧିଗୁଡା ଗ୍ରାମରେ ନିର୍ମାଣ ହୋଇପାରୁନି ଅଙ୍ଗନବାଡି ଗୃହ। ମିଳିଥିବା ତଥ୍ୟ ଅନୁଯାୟୀ ମାଲକାନଗିରି ଜିଲ୍ଲା କୋରୁକୋଣ୍ଡା ବ୍ଲକ ଅନ୍ତର୍ଗତ ଗୋନ୍ଧିଗୁଡା ଗ୍ରାମରେ ଆଜି ଯାଏଁ ଏକ ଅଙ୍ଗନବାଡି ଗୃହ ନିର୍ମାଣ ହୋଇପାରିନି। ଫଳରେ ଖରା ବର୍ଷା ଏଠାକାର କୋମଳମତି ପିଲାଏ ଘର ବାରଣ୍ଡାରେ ବସି ପ୍ରାକ ଶିକ୍ଷା ଲାଭ କରୁଛନ୍ତି। ତେବେ ସରକାର ଓ ପ୍ରଶାସନର ଅବହେଳା ଯୋଗୁ ଆଜି ଯାଏଁ ଏଠାରେ ଅଙ୍ଗନବାଡି ଗୃହ ନିର୍ମାଣ ହେଉ ନଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏହି ଅଞ୍ଚଳରେ ଅନେକ ଡିଡାୟୀ ଜନଜାତିର ଲୋକେ ରହୁଥିବା ବେଳେ ଅଞ୍ଚଳରେ ଶିକ୍ଷାର ଭୂମିକା ବେଶ ଗୁରୁତ୍ଵପୂର୍ଣ। ଯେଉଁଥି ପାଇଁ ଗ୍ରାମବାସୀ ନିଜ ପିଲାଙ୍କୁ ପାଠ ପଢାଇବାକୁ ଇଚ୍ଛୁକ, ହେଲେ କୁନି କୁନି ପିଲାଙ୍କ ପାଇଁ ଅଙ୍ଗନବାଡି ଘର ଖଣ୍ଡିଏ ନଥିବାରୁ ପିଲାଏ ବର୍ଷ ତମାମ ଏପରି ଘର ବାରଣ୍ଡାରେ ପ୍ରାକ ଶିକ୍ଷା ଗ୍ରହଣ କରୁଛନ୍ତି। ଏଠାରେ ଅଙ୍ଗନବାଡି କର୍ମୀ ନିଯୁକ୍ତି ହୋଇଥିବା ବେଳେ ସେ ନିଜ ଦାୟିତ୍ୱକୁ ସୂଚାରୁ ରୂପେ ତୁଲାଉଛନ୍ତି ସତ, କିନ୍ତୁ ଘର ବାରଣ୍ଡାରେ ପିଲାଙ୍କୁ ପଢାଇବା ଓ ସୁଷମ ଖାଦ୍ୟ ପ୍ରଦାନ କରିବାରେ ନାନା ସମସ୍ୟା ଭୋଗୁଥିବା ଦେଖିବାକୁ ମିଳିଛି। ତେବେ ଅଞ୍ଚଳରେ ଏକ ଅଙ୍ଗନବାଡି ଗୃହ ନିର୍ମାଣ କରିବାକୁ ସ୍ଥାନୀୟ ଲୋକେ ଦାବି କରିଥିବା ବେଳେ ଏନେଇ ଆମେ କୋରୁକୋଣ୍ଡା ସିଡିପିଓ ରେଖାରାଣୀ ବାରିକଙ୍କୁ ଯୋଗାଯୋଗ କରିବାରୁ ସେ ପ୍ରକାଶ କରିଛନ୍ତି ଯେ, କେଉଁ କାରଣରୁ ଅଙ୍ଗନବାଡ଼ି ଘର ନିର୍ମାଣ ହୋଇନି ଓ ପ୍ରକୃତ ସମସ୍ୟା କଣ ତାହାର ତଦାରଖ କରି ପଦକ୍ଷେପ ନେବେ।
About the Author
