ଯୋଡ଼ା, ୧୫/୦୮(ପାଇକପୁଅ)ପବିତ୍ର ସ୍ୱାଧୀନତା ଦିବସର ଅବସରରେ ଟାଟା ଷ୍ଟିଲ ସେଣ୍ଟ୍ରାଲ ଫିଲ୍ଡ ଗ୍ରାଉଣ୍ଡରେ ଏକ ଆକର୍ଷଣୀୟ ଓ ସମାରୋହପୂର୍ଣ୍ଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ସମାରୋହରେ ଭିନ୍ନ ଭିନ୍ନ ସ୍କୁଲର ପ୍ରାୟ ୭୦୦ରୁ ଉର୍ଦ୍ଧ୍ୱ ଛାତ୍ରଛାତ୍ରୀ, ଶିକ୍ଷକ-ଶିକ୍ଷୟିତ୍ରୀ, ସ୍ଥାନୀୟ ଜନସାଧାରଣ ଏବଂ ଟାଟା ଷ୍ଟିଲର ବରିଷ୍ଠ ଅଧିକାରୀମାନେ ଉପସ୍ଥିତ ରହି ଦେଶଭକ୍ତିର ସହ ସ୍ୱାଧୀନତା ଦିବସ ପାଳନ କରିଥିଲେ। କାର୍ଯ୍ୟକ୍ରମ ପ୍ରାରମ୍ଭରେ ସ୍କୁଲ ଛାତ୍ରଛାତ୍ରୀମାନଙ୍କ ଦ୍ୱାରା ଏକ ମନୋରମ ପରେଡ୍ ଓ ମାର୍ଚ୍ଚ ପାଷ୍ଟ ପ୍ରଦର୍ଶନ କରାଯାଇଥିଲା। ଜାତୀୟ ପତାକାକୁ ସଲାମୀ ଦେବା ସହ କୋମଳମତି ଶିଶୁମାନଙ୍କ ଶୃଙ୍ଖଳିତ ମାର୍ଚ୍ଚ ପାଷ୍ଟ ଏବଂ ଦେଶଭକ୍ତିମୂଳକ ସ୍ଲୋଗାନ ସମଗ୍ର ଗ୍ରାଉଣ୍ଡକୁ ଉତ୍ସବମୁଖର କରିତୋଳିଥିଲା।
ବ୍ରହ୍ମା କୁମାରୀ ଜୟନ୍ତୀ ଭଉଣୀଙ୍କ ଉଦ୍ବୋଧନ ଓ ‘ନଶା ମୁକ୍ତ ଭାରତ ଅଭିଯାନ’ ଶପଥ ଗ୍ରହଣ:
କାର୍ଯ୍ୟକ୍ରମର ଶେଷ ଭାଗରେ ପ୍ରଜାପିତା ବ୍ରହ୍ମାକୁମାରୀଜ୍ ଈଶ୍ୱରୀୟ ବିଶ୍ୱବିଦ୍ୟାଳୟ ତରଫରୁ ଭାରତ ସରକାରଙ୍କ ‘ନଶା ମୁକ୍ତ ଭାରତ ଅଭିଯାନ’ ଅଧୀନରେ ଏକ ସଂକଳ୍ପ/ଶପଥ ଗ୍ରହଣ କାର୍ଯ୍ୟକ୍ରମ ଆୟୋଜିତ ହୋଇଥିଲା।
ମଞ୍ଚରୁ ବ୍ରହ୍ମା କୁମାରୀ ଜୟନ୍ତୀ ଭଉଣୀ ଉପସ୍ଥିତ ଜନସମାବେଶକୁ ନଶାମୁକ୍ତି ଓ ସୁସ୍ଥ ସମାଜ ଗଠନ ସମ୍ପର୍କରେ ପ୍ରେରଣାଦାୟୀ ଉଦ୍ବୋଧନ ଦେଇଥିଲେ ଏବଂ ତତ୍ପଶ୍ଚାତ୍ ସମସ୍ତଙ୍କୁ ନଶାମୁକ୍ତିର ଶପଥ ପାଠ କରାଇଥିଲେ। ଏହି ଅବସରରେ ମଞ୍ଚରେ ବ୍ରହ୍ମା କୁମାରୀ ମଞ୍ଜୁ ଭଉଣୀ, ବ୍ରହ୍ମା କୁମାରୀ କୁନ୍ନୀ ଭଉଣୀ ଏବଂ ସଂସ୍ଥାର ଅନ୍ୟାନ୍ୟ ସଭା ସହଯୋଗୀଗଣ ଉପସ୍ଥିତ ଥିଲେ। ସମସ୍ତ ଭଉଣୀମାନଙ୍କ ନେତୃତ୍ୱରେ ଗ୍ରାଉଣ୍ଡରେ ଉପସ୍ଥିତ ୭୦୦ରୁ ଊର୍ଦ୍ଧ୍ୱ ଅଧିକାରୀ, ଶିକ୍ଷକ, ଛାତ୍ରଛାତ୍ରୀ ଓ ନାଗରିକ ନିଜର ଡାହାଣ ହାତ ବଢ଼ାଇ ନଶାମୁକ୍ତ ରହିବା ପାଇଁ ଦୃଢ଼ ଶପଥ ଗ୍ରହଣ କରିଥିଲେ।
ବିକଶିତ ଭାରତ ଗଠନରେ ସହଯୋଗର ସଂକଳ୍ପ:
ଶପଥ ଗ୍ରହଣ ସମୟରେ ସମସ୍ତେ ସଂକଳ୍ପ ନେଇଥିଲେ:
“ଆମେ ଶପଥ ନେଉଛୁ ଯେ ନିଜକୁ, ଆମ ପରିବାର ଓ ସମାଜକୁ ସମସ୍ତ ପ୍ରକାର ନଶାରୁ ଦୂରରେ ରଖିବୁ। ଭାରତ ସରକାରଙ୍କ ‘ନଶା ମୁକ୍ତ ଭାରତ’ ଏବଂ ‘ବିକଶିତ ଭାରତ’ ଗଠନର ଅଭିଯାନରେ ଆମର ପୂର୍ଣ୍ଣ ସହଯୋଗ ପ୍ରଦାନ କରିବୁ ଏବଂ ଏକ ସୁସ୍ଥ, ସଶକ୍ତ ଓ ସମୃଦ୍ଧ ଭାରତ ଗଠନରେ ନିଜର ଯୋଗଦାନ ଦେବୁ।”
ପ୍ରଶଂସନୀୟ ଉଦ୍ୟମ:
ଟାଟା ଷ୍ଟିଲ ପରିଚାଳନା, ସ୍କୁଲ ପ୍ରଶାସନ ଓ ସ୍ଥାନୀୟ ବୁଦ୍ଧିଜୀବୀମାନେ ବ୍ରହ୍ମା କୁମାରୀଜ୍ ସଂସ୍ଥା ତରଫରୁ କରାଯାଉଥିବା ଏହି ମହତ ଓ ସମାଜସୁଧାର କାର୍ଯ୍ୟକ୍ରମକୁ ଭୂୟସୀ ପ୍ରଶଂସା କରିଥିଲେ। ସେମାନେ ପ୍ରକାଶ କରିଥିଲେ ଯେ ଯୁବପିଢ଼ିକୁ ନଶାମୁକ୍ତ କରିବା ହିଁ ବିକଶିତ ଭାରତ ଗଠନର ମୁଖ୍ୟ ପଥ। କାର୍ଯ୍ୟକ୍ରମର ଶେଷରେ ସଂସ୍ଥା ତରଫରୁ ଆନୁଷ୍ଠାନିକ ପତ୍ର ଓ ଶପଥ ପତ୍ର ହସ୍ତାନ୍ତର କରାଯାଇଥିଲା।
About the Author
