ଯୋଡ଼ା,୦୨/୦୯(ପାଇକପୁଅ) ସମାଜସେବା କ୍ଷେତ୍ରରେ ନିରନ୍ତର ଓ ଉଲ୍ଲେଖନୀୟ ଅବଦାନ ପାଇଁ ଯୋଡ଼ା ପୌରପାଳିକା ପକ୍ଷରୁ ‘ମାନବ ପ୍ରେମୀ ସେବା ଟ୍ରଷ୍ଟ୍’କୁ ସମ୍ମାନିତ କରାଯାଇଛି । ଯୋଡ଼ା ପୌରପାଳିକା ପକ୍ଷରୁ ଆୟୋଜିତ ସ୍ୱାୟତ୍ତ ଶାସନ ଦିବସ ପାଳନ ଅବସରରେ ଟ୍ରଷ୍ଟ୍ର ସମାଜସେବାମୂଳକ କାର୍ଯ୍ୟକୁ ସ୍ୱୀକୃତି ଦେଇ ଏହି ସମ୍ମାନ ପ୍ରଦାନ କରାଯାଇଥିଲା । ସମାଜର ଅବହେଳିତ, ଅସହାୟ ଓ ଆବଶ୍ୟକତା ଥିବା ଲୋକଙ୍କ ପାଖରେ ଠିଆ ହୋଇ ସେମାନଙ୍କୁ ସହଯୋଗର ହାତ ବଢ଼ାଇ ଆସୁଥିବା ‘ମାନବ ପ୍ରେମୀ ସେବା ଟ୍ରଷ୍ଟ୍’ର ବିଭିନ୍ନ ସେବାମୂଳକ କାର୍ଯ୍ୟକୁ ନେଇ ଏହି ସମ୍ମାନ ଦିଆଯାଇଥିବା ଜଣାପଡ଼ିଛି । ଟ୍ରଷ୍ଟ୍ ପକ୍ଷରୁ ବିଭିନ୍ନ ସମୟରେ ଗରିବ ଓ ଅସହାୟଙ୍କୁ ସହାୟତା, ସାମାଜିକ ସଚେତନତା ସୃଷ୍ଟି, ମାନବିକ ସେବା, ଆବଶ୍ୟକତା ସମୟରେ ଲୋକଙ୍କୁ ସହଯୋଗ ସମେତ ବିଭିନ୍ନ ଜନହିତକର କାର୍ଯ୍ୟ କରାଯାଉଛି । ସେବାକୁ ମୁଖ୍ୟ ଲକ୍ଷ୍ୟ କରି ନିରବଚ୍ଛିନ୍ନ ଭାବେ ଏଭଳି କାର୍ଯ୍ୟ ଜାରି ରଖିବା ଟ୍ରଷ୍ଟ୍ର ଏକ ପ୍ରମୁଖ ବିଶେଷତ୍ୱ ବୋଲି କୁହାଯାଇଛି । ସ୍ୱାୟତ୍ତ ଶାସନ ଦିବସ କେବଳ ପୌରସଂସ୍ଥାର କାର୍ଯ୍ୟକଳାପ ଓ ଉନ୍ନୟନର ସମୀକ୍ଷାର ଦିନ ନୁହେଁ, ବରଂ ସହରର ବିକାଶରେ ଅବଦାନ ରଖୁଥିବା ବ୍ୟକ୍ତି, ସଂଗଠନ ଓ ସେବାମୂଳକ ପ୍ରତିଷ୍ଠାନଗୁଡ଼ିକୁ ପ୍ରୋତ୍ସାହନ ଦେବାର ମଧ୍ୟ ଏକ ଅବସର । ଏହି ପରିପ୍ରେକ୍ଷୀରେ ସମାଜସେବା କ୍ଷେତ୍ରରେ ଟ୍ରଷ୍ଟ୍ର ଭୂମିକାକୁ ସମ୍ମାନ ଦେବା ସାମାଜିକ କାର୍ଯ୍ୟକର୍ତ୍ତା ଓ ସେବାମୂଳକ ସଂଗଠନଗୁଡ଼ିକ ପାଇଁ ଏକ ପ୍ରେରଣାଦାୟକ ପଦକ୍ଷେପ ବୋଲି ମତ ପ୍ରକାଶ ପାଇଛି । ସମ୍ମାନ ଗ୍ରହଣ କରି ‘ମାନବ ପ୍ରେମୀ ସେବା ଟ୍ରଷ୍ଟ୍’ ପକ୍ଷରୁ ଯୋଡ଼ା ପୌରପାଳିକାକୁ କୃତଜ୍ଞତା ଜଣାଯାଇଥିଲା । ଏହି ସମ୍ମାନ ଟ୍ରଷ୍ଟ୍ର ସମସ୍ତ ସଦସ୍ୟ, ସ୍ୱେଚ୍ଛାସେବୀ ଓ ଶୁଭେଚ୍ଛୁମାନଙ୍କୁ ଆଗାମୀ ଦିନରେ ଅଧିକ ଉତ୍ସାହର ସହ ସମାଜସେବା କରିବାକୁ ପ୍ରେରଣା ଯୋଗାଇବ ବୋଲି ଟ୍ରଷ୍ଟ୍ ପକ୍ଷରୁ କୁହାଯାଇଛି ।
About the Author
